I Fiumicinu pe Lamezia comu ‘nta nu carru bestiame!

Ven, 31/01/2014 - 19:37

Cari compatrioti, bona dominica. A domanda i oji è chista: vi capitàu mai u pigghiati l’aereu i Roma Fiumicinu pe’ Lamezia o Riggiu? A mmia mi capitau u jornu 24 gennaiu, pe’ sfortuna mia, e criju ca mai cchiù mi vaji a capitari. U fattu è ca tornava i Barcellona, e all’andata non mi capitàu nenti i stranu. Dicimu puru ca jìu tuttu troppu bonu finu o’ rientru, finu a quandu non ‘ndi ficiru sentiri natta vota “a casa”, comu si prima èramu ‘nta nattu universu. Stava caminandu ‘nta l’aeroportu cercandu l’uscita pemmu pigghiu l’aereu pe’ Lamezia, e mi girava e mi votava, éranu tutti voli belli organizzati, tutti in fila, senza stress, tuttu ordinatu, cu nu bellu spaziu intornu… ‘nzomma non ti pisava u spetti in fila. I voli eranu pe’ Milanu, Venezia, Bologna, Dusseldorf, Berlino… u meu no’ trovava. Poi n’indicazioni dicìa u scindìmu na scala pe’ sutta, e jìa. Nta nu momentu mi trovai ‘nta nattu mundu! Non scherzu si dicu ca ‘nta n’area piccolissima eramu accalcati armenu 4000 cristiani (ovviamenti non tutti cristiani, ma è pe’ diri!). Mi pigghiàu improvvisamenti na carfunìa infinita e ‘ncignai a sudari friddu, ma ‘ndavìa u resistu senza perdiri a calma. Mi dissi: chi sfortuna! Non potìamu capitari o’ pianu i supa? E a curiosità mi portau u mi chiedu l’atti voli vicinu a mia aundi jìanu… e tuttu tornau. Ma certu! Arretu i mia c’era u volu pe’ Riggiu Calabria, cchù avanti c’era u Bari, poi Palermu, Catania, Napoli, ecc. ‘Ndavìa capisciutu. Poi mi dicu ca sugnu ieu a mala penzanti, e ‘mbeci no, pecchì ‘ndaju raggiuni: ‘ndi trattanu comu besti, e puru peju! Eramu tutti in fila unu supa all’attu ca sentìamu puru u fiatu ‘nto collu, e puru si distinguìa unu chi ‘ndavìanu mangiatu, e non ti potivi lamentari né spostari, sinnò perdivi u postu! A nu certu puntu unu gridau: “e vabbò ca simu du sud, però…!” Cioè si capiscìa benissimu ca chillu trattamentu era riservatu pa’ genti chi jìa o sud, s’accorgiru tutti. Ieu pensai ca nui, popolu du sud, simu i sempi viaggiaturi (beh, no i sempi, du 1861, ca prima non emigrava nugliu!) e vistu ca ‘ndavi sempi na marea i genti nostra chi scindi potarrìanu riservari pe’ nui n’area cchiù rrandi, senza u morimu ‘mpiccicati. E ‘mbeci pari ca non vaji accussì: cchiù simu e cchiù ‘ndi trattanu comu besti. Non mi criditi? Fativi nu viaggicegliu e poi vidimu! Quandu dicu ca ped’igli nui simu bboni sulu pe’ voti e pemmu accattamu o’ supermercatu a rroba marcia du nord, u dicu cu raggiuni. Cca esti na colonia interna, simu sfruttati, derubati e pigghiati ‘ngiru, e ‘ndi fannu cridìri ca ennu igli chi mantènunu a nui. Volarrìa u viju si nugliu vai cchù u vota chi fini fannu i politici cari, e si non accattamu cchiù nenti du nord comu chiudunu tutti i fabbrichetti chi ‘ndannu! Volarrìa u viju…

Autore: 
Brigantessa Serena Iannopollo
Rubrica: 
Tags: 

Notizie correlate