Michele Bello: L’arduri perdutu, a dignità perduta

Mer, 12/02/2014 - 18:08

Ognin’ vota chi vaju a scola u pigghiu a figghima e laprunu i porti… u cori meu faci nu sartu, i dispiaciri, d’incomprensioni, i sdegnu. A bandera itagliana vicinu a Michele Bello, unu di martiri i Gerace! Povero Michele, dicu ‘nta mmia. Quantu arduri ‘ndavìa, quantu amuri pa’ terra sua, quantu fujìu a ppedi ‘nta jonica e ‘nte paìsi pemmu grida a libertà da terra sua! Sa’ fici fujiendu i Bovalinu finu A Roccella, cogghìu omini e combattìu pe n’ideali chi ‘ndavìa ‘nto cori: L’Itaglia unita e libera dì soprusi. Michele Bello morìu giovanissimu, a 25 anni, ma ‘ndeppi u tempu pemmu viaggia ‘nta capitali, Napoli, avùndi studiau giurisprudenza. E fu ccà chi capitàu ‘nte riunioni liberali chi ‘nci ispiraru l’idee soi. E pensu: comu cangiàru i tempi! Na vota ‘ndavìamu u coraggiu u ‘ndi ribellamu, u cogghìmu perzuni pe’ fari comizi improvvisati ‘nte strati, avundi esti esti, pemmu divulgamu l’idee. E mo? L’arduri sidernisi finìu cu Michele Bello. E si, pecchì poi vinni l’Itaglia. E Itaglia unita non vorzi diri chigliu chi sperava Michele, ma l’esattu contrariu: perdita i dignità, d’identità, e i vogghia i cumbattìri. Praticamenti diventàmma na colonia interna i’ l’Abruzzu finu a Sicilia. I solitu i coloni’ sunnu fora i nu paìsi, u nostru fu nu casu tuttu speciali, puru pecchì non u scrivìru ‘nte carti ca simu colonia: ‘ndi ficiru cridiri ca simu itagliani comu all’atti, ma ‘nto praticu non fu e non è beru. Pecchì a prima cosa chi ficiru fu u ‘ndi chiudunu i scoli pe’ 15 anni, pemmu creanu na popolazioni d’analfabeti, e vui sapiti ca cu non studia è cchiù facili u si manipola. Poi ‘ndi chiudiru i minieri (e sulu ‘nta Calabria ‘ndavìamu cchiù i na vintina i minieri pe’ l’estrazioni di metalli, u sapìavu?), ‘ndi chiudiru u cchiù randi stabilimentu siderurgicu europeu ca era chigliu i Ferdinandea e Mongiana, ‘ndi distruggiru tutti i speranzi, pecchì si cu’ Borbone u territoriu era assai valorizzatu (u sapìavu ca a prima ferrovia fu chiglia i Napoli-Portici, sempi sutta i Borbone?), cu l’Itaglia iniziau a fini nostra, pecchì tutti i sordi chi i piemontisi trovaru si levaru pe’ supa pemmu costruìsciunu u nord (u sapìavu ca u nord prima i l’unità era na paludi povera?) e a nui ‘ndi dassaru senza strati, senza comunicazioni, senza treni, e ‘ndi dissiru ca furu igli chi ‘ndi sarvaru a nui. E nui ‘nci cridimma. Poi emigramma. ‘Ndavi calabrisi, siciliani, campani ‘nta l’America,l’ Australia, l’Argentina. Fumma costretti u m’emigramu pecchì non c’era cchiù lavuru, ma prima? Prima l’emigrazioni non esistìa, cominciàu cu l’unità d’itaglia. Michele Bello non potìa sapiri comu jìa a finiri, sinnò non criju ca si facia mmazzari pe’ Sa(b)oia. Chillu chi speru è u trovamu nu pocu d’arduri chi esti ‘nto sangu nostru, u ‘ndi ribellamu e’ soprusi, pecchì ormai ennu 153 anni chi subimu, ed è ura u ‘ndi arzamu. A memoria perduta a ritrovamma, mo è ura u agimu.

Autore: 
Brigantessa Serena Iannopollo
Rubrica: